MUSTIKA RAMADHAN #6
ULAH KALEULEUWIHI
Sadaya puji kagungan Allah swt, anu parantos ngawajibkeun ka urang sadayana kana ngalakonan ibadah shaum, sim kuring nyaksian saestuna teu aya deui pangéran anu hak disembah anging gusti Allah, anu ngagaduhan kautamian sareng pirang-pirang kani’matan, sareng sim kuring nyaksian kana saéstunya kanjeng Nabi Muhammad saw. hambana Allah sareng RasulNa anu ngagaduhan karamah anu sampurna. Shalawat miwah salam pamugi tetep linunturan ka kangjeng Nabi Muhammad saw. ka kulawarginya sareng sahabatna anu marulya.
Baraya Rohimakumullah!
Kaleuleuwihi dina sagala perkara kacida hinana tur dicaram. Komo dina perkara kadaharan jeung inuman,
Dawuhan Allah:
( وَكُلُوا وَاشْرَبُوا وَلا تُسْرِفُوا إِنَّهُ لا يُحِبُّ الْمُسْرِفِينَ ) سورة الأعراف: 31
" Dahar jeung inum, tur ulah kaleuleuwihi. Satemenna Allah teu mikaresep ka jalma-jalma anu kaleuleuwihi. ” (QS. Al-A’raf: 31)
Nabi sallallahu ‘alaihi wa sallam ogé ngadawuh:
مَا مَلأَ آدَمِيٌّ وِعَاءً شَرًّا مِنْ بَطْنٍ ، بِحَسْبِ ابْنِ آدَمَ لُقَيْمَات يُقِمْنَ صُلْبَهُ ، فَإِنْ كَانَ لا مَحَالَةَ ، فَثُلُثٌ لِطَعَامِهِ ، وَثُلُثٌ لِشَرَابِهِ ، وَثُلُثٌ لِنَفَسِهِ (رواه الترمذي، رقم 2380، وابن ماجه، رقم 3349، وصححه الألباني في صحيح الترمذي، رقم 1939)
“Teu aya wadah anu dipinuhan ku anak Adam nu leuwih goréng tibatan beuteungna. Anak Adam cukup ngonsumsi sawatara huap kadaharan keur nguatkeun tulang igana. Lamun enya euweuh deui jalan séjén (dahar leuwih loba), sakuduna bikeun sapertilu keur (tempat) kadaharan, sapertilu keur (tempat) inuman jeung sapertiluna keur (tempat) nafasna." (HR. Tirmizi, no. 2380, Ibnu Majah, no. 3349, dishahihkeun ku Al-Albany dina kitab shahih Tirmizi, no. 1939)
Ulah poho syukuran ka Allah kana sagala kanikmatan anu tos dipaparinkeun dugi ka detik ayeuna. .
Wilujeng mayunan ibadah saum dinten ka sabelas sareng saterasna pamuga kénging kabarokahan. Amin.
Wassalamualaikum warahmatullahi wabarakatuh,
Ki Dharmasetiawan Natapradja
Ajar Ki Ajar Sunyapada Yayasan SKKS
Padukuhan Pakukajar, wanci janari gedé,
7 Ramadhan 1438 H
advertising area:
0 komentar:
Post a Comment