TUJUH RUPA SOSOBATAN,
NGAN HIJI NU DIBAWA KA AKHÉRAT
NGAN HIJI NU DIBAWA KA AKHÉRAT
Baraya Rohimakumullah!
1. “Ta’aruffan”, nyaéta sosobatan anu kawangun sabab urang kungsi wawuh ku alatan kabeneran, upamana papanggih di kareta api, halte, rumah sakit, kantor pos, ATM, bioskop jeung sajabana.
2. “Taarīhan”, nyaéta sosobatan anu kawangun sabab aya anasir sajarah, upamana babaturan salembur, sa-almamater, kungsi kost babarengan, kursus babarengan jsbn.
3. “Ahammiyyatan”, nyaéta sosobatan anu kawangun sabab aya anasir kapentingan khusus, kayaning usaha, politik, atawa aya keperluan pribadi, jsbn.
4. “Fārihan”, nyaéta sosobatan anu kawangun sabab aya anasir karesep/hobby, kayaning babaturan di paguyuban futsal, badminton, tenis, maén ball, catur, nguseup, moro jsbn.
5. “Amalan”, nyaéta sosobatan anu kawangun kusabab alatan sarua pakasaban, kayaning, papada dokter, guru, dosen, jsbn.
6. “Aduwwan”, nyaéta sosobatan tapi musuh, di hareupeun siga bener, tapi anu sabenerna di jero haténa mah pinuh ku kangéwa, nunggu, ngincer tisusud sobatna, “Lamun anjeun meunang kanikmatan, manéhna ngéwa, tapi lamun anjeun meunang musibah, manéhna ngarasa senang” (QS Ali Imrāan 3:120).
Rasulullah saw ngawuruk hiji doa, “Allahumma ya Allah salametkeun abdi ti sobat abdi upami anjeuna ninggali kahadéan abdi anjeunna mindingan, tapi upami ninggali kaawonan abdi anjeuna ngiring nebarkeun.”
7. “Hubban Īmānan”, nyaéta sosobatan anu kawangun ku lahir batin, tulus silih pikaasih jeung pikanyaah karana ALLAH, silih tulungan, silih mapatahan, nutupan aib sobatna, silih béré bandana, malahan kalawan teu ribut, tengah peutingh sok ngadoakeun sobatna.
Bisa jadi manéhna langka papanggih tapi kaasih ka sobatna karana Allah Ta’ala.
Tina katujuh rupa sosobatan tadi, kahiji nepi kagenep bakal sirna di Akhérat, nu nyésa ngan wangunan sosobatan anu ka 7, nyaéta sosobatan anu dipolah karana Allah (QS 49:10),
“Sosobatan anu leket dina poé éta (Qiyamat) jadi musuh pikeun nu séjénna, kajaba sosobatan karana Kataqwaan” (QS 43:67).
Wattawa shaubil haqq, wattawa shaubil shobr.
Diriwayatkeun, yén lamun nu hak ngaranjrek di Surga geus arasup ka Surga, terus maranéhanana teu manggihan sobat-sobatna nu sok babarengan nalika di dunya, maranéhanana tatanya ka Allah Subhaanahu wa ta’ala … "Yaa Rabb…Abdi henteu mendakan sobat-sobat abdi nalika di dunya, anu sok Shalat sasarengan, sok shaum sasarengan, malihan bajoang sok sasarengan."
Lajeng Allah subhanahu wa ta’ala ngadawuh: "Jung indit ka naraka, terus kaluarkeun sobat anjeun nu dina haténa aya Iman sanajan sagedé siki sawi" (HR. Ibnul Mubarak dina kitab "Az-Zuhd")
Al-Hasan Al-Bashri nyanggem: "Lobaan sobat-sobat anjeun anu Mu’min, sabab maranéhnanana miboga Syafa’at dina poé kiamat."
Ibnul Jauzi kungsi peupeujeuh ka Sahabat-sahabatna bari nangis : "Lamun anjeun henteu manggihan kuring jaga di surga babarengan jeung anjeun, mangka taroskeun ka Allah ta’ala ngeunaan kuring, "Nun Gusti abdi, hamba Anjeun pun Fulan, nalika di dunya salawasna ngélingan abdi dina perkawis Anjeun. Kukituna lebetkeun anjeuna ka surga Pangeresa, sasarengan sareng abdi."
Baraya rohimakumullah, pamuga ku jalan ieu, aki ngélingan ngeunaan Allah ta’ala supados Aki tiasa sasarengan sareng baraya sadayana jaga di Surga sareng ngahontal Ridho- Anjeunna.…
Abdi neneda ka Pangeresa ya Allah "Karuniakeun ka abdi Sahabat-Sahabat anu salalawasna ngajak tumut, taat kana Syaréat Pangeresa, Langgengkeun sosobatan abdi dugi ka tiasa pendak sareng Pangeresa Gusti di akhérat jaga …. Aamiin..
Suku Gunung Sawal, Jumaah 5 Mei 2017.
Ki H Dharmasetiawan Natapradja
Ajar Sunyapada Paguron Luhur Yayasan SKKS.
advertising area:
0 komentar:
Post a Comment